Moses Amukoto, oshilyo-nale shElelo lyOpombanda mOngudu yoRally for Democracy and Progress (RDP) na okwali nale Kansela mElelo lyOndoolopa yaNdangwa okwa thigi po ongudu ndjoka nokwiikutha miikwapolitika.
Sho a popi noNamibian Sun mEtiyali, Amukoto okwati, oolopota kutya okwali oshilyo shelelo lyopombanda mongudu ndjoka, shoka sha ndopa okumona onkatu pethimbo lyokongressa ya ningwa koRDP omvula ya piti, ka dhi na uukwashili.
Okwati, i na hala okuninga eikutho lye mongudu ndjoka onga oshinima oshinene ihe okwa hala okuyeleka kutya ye i na ndopa okulikola onkatu yasha pethimbo lyomutumba omunene gwoRDP, molwaashoka okwa adhika nale a thiga po ongudu ndjoka pethimbo okongressa ya ningwa.
Amukoto okwati, okwa tokola okwiikutha mo mongudu molwaashoka i na nyanyukilwa okwaahena uushili hoka ku li melelo lyongudu oshowo omukalo gwekondjelo lyoompito mongudu ndjoka yi na woo aantu taya nyateke omadhina ga yakwawo.
Amukoto ngoka e li omumwayinamati omukuluntu gwaKansela gwOshikandjohogololo shaMuthiya, Armas Amukoto gwOngudu yoSwapo, okwati i na joina natango ongudu yilwe yopolitika na okwa holola kutya oongudu dhopolitika odha taalela etopokauko.
“Onda kala monkalo ya dhigupala noonkondo. Onda kala tandi ulwa omalaka omawinayi nongeshefa yandje oya shuna pevi noonkondo omolwa iinima iiwinayi nda kala tandi lundililwa molwaashoka ngame ondi li oshilyo shoRDP. Oongudu dhopolitika odha eta etopokauko mokati kaakwanezimo yandje. Yamwepo yomaakwanezimo yandje ihatu popi we nayo, onkene onda tokola okuhogolola pokati kuukumwe mofamili yandje nongudu yopolitika,” Amukoto ta ti.
Amukoto oku li omukondjelimanguluko na okwali e na onkatu yUuletenanda-Ndjai mEtanga lyEgameno omanga i na za miilonga mo-2004.
Okwali gumwe gwomaakwateli komeho yehololomadhilaadhilo ndyoka lya ningwa mOmuthiya oomvula dha piti, ndyoka lya thiga aahololimadhilaadhilo yamwe ye ehamekwa konima sho opolisi yali ya thiminikwa okulongitha omiku dhomahodhi oshowo ooholo dhoongumi okuhalakanitha engungo lyaamboka yali taya ningi ehololomadhilaadhilo.
Ooyene yoondingosho mboka oyali taya holola omaiyuvo gawo gonayi omolwa oompango oompe dhomashangitho goongeshefa ndhoka dha tulwa miilonga nodha gumu oongeshefa dhawo.
Category: