Elenga mElelo lyoPamuthigululwakalo lyoKapika Royal House Chief Hikuminue Kapika, momundhingoloko gwEpupa moKunene, okwa pewa egameno lyopolisi konima sho a ningilwa omatilitho geso, sha landula omapopyo kutya okwa pitika iilonga yopoloyeka yoBaynes Hydropower yi pule komeho.
Kapika ngoka a li a tindi okupitika Epangelo li tamekithe iilonga yopoloyeka ndjoka omimvo dha piti, okwa pewa egameno lyaanambelewa yopolisi ya thika pu yahetatu mboka taye mu tonatele oshowo egumbo lye. Nguka omwaalu omunene gwaapolisi gwotango tagu pewa omuleli gwopamuthigululwakalo konima nkene oshilongo sha manguluka.
Egumbo lyaKapika otali adhika oshinano shookilometa 20 mUumbugantu wEpupa Falls.
Egameno lyoludhi ndoka ohali pewa aluhe aanenentu ngaashi oominista, aapeha-minista naakalelipo yiilongo, ihe nonando ongaaka ohaya pewa owala aanambelewa yopolisi inaya konda pu yatatu.
Komanda gwOpolisi mOshitopolwa shaKunene, Mandume Shifonono okwa koleke kutya Omukwaniilwa Kapika okwa ningi eidilo opo a pewe egameno na okwa pewa egameno ndyoka a pula konima sho kwa monika omaumbangi kutya ope na oongudu dhaantu oohandimwe mboka ya ningi omatilitho goku mudhipaga.
“Itatu vulu oku mu tindila egameno ndyoka ta pula molwaashoka omwenyo gwe ogu li moshiponga. Otwa yamukula keidilo lye noku mu pa egameno ndyoka a pula naashoka oshi li momusindalandu gwiilonga yaanambelewa yopolisi okukwashilipaleka kutya Omukwaniilwa Kapika okwa gamenwa, shi vulithe okutinda eidilo ndyoka a ningi, e tatu ka kala tatu pewa ombedhi uuna a yi moshiponga,” Shifonono ta ti.
Pethimbo onzonkundaneki yoNampa ya talele po egumbo lyElenga ndoka, aanambelewa yopolisi oya indike omutoolinkundana gwoNampa aa ye megumbo ndyoka omanga i na pewa epitikilo komukwaniilwa. Konima sho omukwaniilwa a zimine, omutoolinkundana okwali a hadhwa ku talike ngele oku na iilwitho.
Kapika okwa tindi kutya okwa ningi eidilo opo a pewe egameno molwaashoka okwa ningilwa omatilitho geso.
“Itandi vulu okutya ka ndi na aatondi molwaashoka kandi shi kutya oolye mboka nda uvitha nayi moonkalamwenyo dhawo onga omulumentu. Ompito otayi vulu okukala po kutya ondi na aatondi ihe itandi vulu okuya tseya,” Kapika.
Kapika okwa gwedha po tati, i ta dhimbuluka omatilitho geso ga ningilwa aakwanegumbo lye nenge ye mwene opo shi etithe egameno ndyoka a pewa kopolisi.
Omapopyo kombinga yegameno lyaKapika otaga holola kutya, yamwepo yomaakwashigwana momudhingoloko ngoka, mboka taye mu lundile kutya okwa shaina oombapila dhoka tadhi pitike Epangelo opo li pule komeho netungo lyopoloyeka yoshitaasi shoonkondo dholusheno yoBaynes Hydropower Station, oye mu ningile omatilitho geso.
Omapopyo gamwe natango ga holoka otaga ti kutya, ope na yamwe mboka ya hala okukutha elenga ndoka koshipundi.
Gabriel Kapika, omunashipundu gwoKapika Royal House, okwa lombwele Nampa kutya okwa uva omitoto kombinga yomatilitho geso ngoka ga ningilwa Elenga.
Opolisi oyati otayi kala nokugandja egameno ndyoka kuKapika sigo kwa monika kutya omwenyo gwe ka gu li we moshiponga.
Opoloyeka yoshitaasi shoonkondo dholusheno yoBaynes Hydropower Project, ndjoka tayi tungwa mOmulonga gwaKunene otaku tengenekwa tayi ka pula iimaliwa ya thika pobiliyona dhaaNamibia 12, na oya nuninwa okukaleka po oonkondo dholusheno moshilongo molwaashoka Namibia monena oha kutha pondje yoshilongo, konyala oopresenda 60 dhoonkondo dholusheno ndhoka ha longitha.
Category: