Edhimbuluko lyoshiponokela shomboma shoka sha dhipaga aakwashigwana mombaanga yoBarclays mOshakati oomvula 26 dha piti monena otali kwathele mokwaaludha iilalo.
Ngaka omaiyuvo gOmunashipundi gwoLaw Reform Development Commission, Sacky Shanghala, pethimbo kwa ningwa edhimbuluko lyoshiponokela shoka sha dhipaga aantu ya thika po-27, nokuthiga oyendji ye ehamekwa momasiku 19 gaFebruali mo-1988.
Shanghala ngoka a kanitha yina onga oshizemo shoshiponokela shoka okwati, aantu oya pumbwa okudhimbuluka kehe omvula oshiponokela shika opo mboka ya gumwa momukalo kehe koshiponokela shika sha ningwa komutondi ya vule okwaaluka.
“Ito vulu okupita mo muululume mboka na kehe shimwe otashi vulu okweeta uuwehame mboka.
Kutse yamwe oshiponokela shoka osha fa owala opo sha ningwa ohela, oshi li oshitopolwa shonkalamwenyo na otwa pumbwa okupita monkalo ndjika tuli pamwe,” Shanghala ta ti.
Edhimbuluko
Edhimbuluko ndyoka lya ningwa ohela olya ningilwa pemanya ndyoka lya dhikwa poombelewa dhiifuta yiihohela yEpangelo onga omukalo gwokudhimbuluka nokusimaneka oonakuninga oshihakanwa shoshiponokela shoka.
Ngoloneya gwOshitopolwa shaShana Clemens Kashuupulwa, okwa lombwele mboka ya kala pedhimbuluko ndyoka lya ningwa ohela kutya edhimbuluko ndyoka otali ningwa onga omukalo gokudhimbuluka nokusimaneka mboka ya ningi iihakanwa yomukalo omudhipagi gwali hagu longithwa pethimbo lyuukoloni.
“Esiku ndika otali tu eta pamwe opo tu dhimbuluke onkalo moka aamwamememati naakadhona ya dhipagwa,” Kashuupulwa ta ti.
Ngoloneya gwaShana okwa gwedha po ta ti, oshiponokela shoka osha ningwa onga omukalo gwokuya moshipala ongudu yoSwapo yi mone emanguluko lyoshilongo na okwa gandja woo ondjokonona yemonolyiihuna mbyoka ya ningilwa Aanamibia pethimbo lyuukoloni wEpangelo lyaSouth Afrika.
Kashuupulwa okwa ningi omapopyo ngoka nonando omalelo gaSouth Afrika pethimbo ndyoka onkene taga popi kutya Swapo oye a ningi oshiponokela shoka.
Onga esimaneko lyoomwenyo dhaamboka ya hulithila moshiponokela shoka Kashuupulwa, okwa pula Aanamibia ya longele kumwe opo ya kaleke po ombili, uukumwe, uuthikepamwe oshowo edhiminathanopo.
Oshituthidhimbuluko shika osha kaliwa koluhupe lyoshiponokela shoka, aaleli yopambepo mwakwatelwa Omumbisofi Josaphat Shanghala, ngoka omukulukadhi gwe a hulithila moshiponokela shoka oshowo aaleli yopamuthigululwakalo nomalelo giitopolwa.