Elelo lyaShakati otali kunkilile oshigwana

Elelo lyondoolopa yaShakati olya gandja elondodho kaakalimo mondoolopa ndjoka, mboka tayiikuthile evi nokutunga omagumbo gawo owina pomahala hapu tondoka nokuudha omeya neinekelo kutya elelo lyondoolopa otali ke ya tululula.
Pethimbo a popi niikundaneki ohela, omupopiliko gwElelo lyOndoolopa yaShakati, Jackson Muma okwa ti ope na omutoto mokati koshigwana kutya elelo lyoondoolopa aluhe ohali gandja omakwatho kwaamboka omagumbo gawo tagiiyadha kohi yomeya.
Muma okwa ti omutoto ngoka ogwe etitha pombanda eikuthilo lyevi netungo lyomagumbo pomahala mpoka hapu udha omeya mondoolopa ndjoka.
“Elelo olya ndhindhilika nale mboka ye na omagumbo ge li pomahala hapu udha omeya, onkene itali ka dhanitha mboka taya tungu owina omagumbo gawo pomahala mpoka hapu tondoka nenge hapu udha omeya nelalakano opo ya mone omakwatho okuza kelelo lyondoolopa,” Muma ta ti.
Muma okwa gwedha po ta ti, etungo lyomagumbo ngoka gaali pamulandu nopampango ohali ningwa unene momahuliloshiwike nenge konima yoowili dhiilonga.
Muma okwa tsikile ko ta ti, oshizemo shaamboka hayiikuthile evi nokutunga omagumbo gawo pomahala ga puka, omagumbo gawo taga kungululwa po komeya gefundja nokomvula.
“Otatu indile oshigwana shi hulithe po omukalo ngoka molwaashoka ogwa nika oshiponga na otagu tula uundjolowele wawo moshiponga nokuhanagula po omaliko gawo,” Muma ta yelitha.
Elelo lyondoolopa otali tsikile nokukonaakona onkalo ndjoka nokutula miilonga oompango dha kwata miiti opo ku yandwe eyo pombanda lyeikuthilo lyevi netungo lyomagumbo moongamba dhondoolopa.
Muma okwa tseyitha kutya elelo otali longekidha ehala lyokukala mOmukunda Onawa, nehala ndyoka olya nuninwa okutululula aakwashigwana okuza mEkuku nEhenye.
“Elongekidho lyehala ndyoka oli li nale miilonga na okwa tegelelwa iilonga yi manithwe omvula tu li, onkene aakwashigwana otaya pulwa opo ya kale yiidhidhimika sigo elelo lya manitha iilonga opo ku kandulwe po ompumbwe yomahala gokuza mOndoolopa yaShakati,” Muma ta ti.
Opoloyeka yimwepo yomagumbo yi li metifa mOshakati oya kwatela mo ndjoka tayi longekidha omahala gomagumbo ga thika po-272, oshowo omahala ge li 2000 mEhenye omanga mEkuku tamu longekidhwa 1000 nomahala ngoka oga nuninwa aakwashigwana mboka haya mono iiyemo iishona.