Aalumentu aanyasha yatatu yoomvula dhi li pokati ko-18 no-23, oya ningilwa omapulaapulo, shina sha nekwatonkonga lyomwiiyambi gwoAmerican Peace Corps moKatima Mulilo mOlyomakaya.
Omukiintu omunamimvo 25, ngoka e li omulongiskola oku li ta mono epango moshipangelo sha landula sho a ponokelwa.
Omukonaakoni Omukuluntu mOpolisi yaNamibia, Robert Sanjahi, okwa tindi okugandja uuyelele oundji kombinga yoshiningwanima shoka ihe okwa ti omakonaakono oge li metifa.
Ka pe na ngoka a tulilwa mo natango oshipotha pokati kaalumentu ya ningilwa omapulaapulo nolopota yopolisi okuza kunakuninga oshihakanwa okwa tegelelwa natango yi pewe opolisi.
“Oshipotha shekwatonkonga osha patululwa mOlyomakaya na itandi vulu okugandja uuyelele oundji molwaashoka omakonaakono moshipotha shika inaga manithwa natango. Ponkatu ndjika mboka ya ningilwa omapulaapulo aafekelwa owala mboka taya vulu okumangululwa nenge ya tamanekwe mompangu ihe itandi vulu okugandja uuyelele oundji manga,” Sanjahi ta ti.
Sanjahi okwa tindi okugandja uyelele wonkalo moka mu na nakuninga oshihakanwa na ina gandja uuyelele kutya okwa kala moKatima ethimbo li thike peni.
Onzo ndjoka ya popi noshikundaneki shoNamibia Sun oya holola kutya nakuninga oshihakanwa oku li oshilyo shoAmerican Peace Corps, na ota longo onga omulongiskola moNamibia.
Onzo oya tsikile kutya nakuninga oshihakanwa okwali pamwe nakuume ke komulumentu ngoka ali te mu thindikile kegumbo sho ya tsakanekwa kongundu yaalumentu mboka ya tameke okudhenga omulumentu ngoka a li nomukiintu ngoka.
Omulumentu ngoka okwa tsuwa, she etitha a ye ontuku nokuthiga po nakuninga oshihakwana.
Aalumentu mboka oya hilile omukiintu ngoka momilema noku mu kwata koonkondo.
Aalumentu mboka yatatu oya kwatwa po kopolisi opo ya ka ningilwe omapulaapulo .
OPeace Corp, opograma yaayiyambi tayi kwatelwa komeho kEpangelo lyaAmerika, nopograma ndjoka ohayi tumu aakwashigwana yaAmerika opo ya ka longe miilongo yopondje muuyuni na oya nuninwa eyambulepo lyoonkalamwenyo dhaakwashigwana nomaliko giilongo.
Category: