Pethimbo mpoka kwa tamekithwa omwahwahwameko gegameno lyomoondjila omolwa iituthi yomatango omanene twataalela, Ompangu yoPombanda oya ningi etokolo li li muuwanawa waahingi yatatu, mboka kwa lopotwa kutya uushina wokuninga omakonaakono kombinga yondjele yoalkoholi yi li momuhingi mboka wa longithwa pethimbo mboka yatatu ya tulwa miipandeko ka wuli paveta.
Shika osha fatululwa kutya kehe ngoka taka tamanekelwa oshipotha shokuhinga e li kohi yondhungo ota vulu okupataneka oshipotha, kakele ngele aanambelewa yopolisi oya hala okugandja uumbangi wothaatha moshipotha, nena oye na okufala omutamanekwa komundohotola opo a ka kuthwe ombinzi ku talike ngele okwa longitha iikolitha.
Naashika inashi yela natango kutya otashi ka ningwa momukalo guni po unene pomainda gomoondjila taga ningwa pethimbo lyiituthi yomatango omanene.
Aapanguli mOmpangu yoPombanda, Kobus Miller, Naomi Shivute naAlfred Siboleka oshiwike sha piti oya tokola kutya uushina wokututsa wa longithwa moshipotha sha Willem Titus, Lasonga Johannes Kasoma naKaruuo Titus, ka wuli paveta molwaashoka elombwelo lyEpangelo lyomo-2003, ndyoka lyuutha elongitho lyuushina mboka inali gwanitha po iipumbiwa yOmpango yomOondjila nIiyenditho yomo-1999. Shika oshina oshilanduli oshinene kaanambelewa yetulo miilonga lyooveta naapanguli miipotha yokuhinga aantu ye li kohi yondhungo.
Omupanguli-Presidende Petrus Damaseb okwa gandja elombwelo opo iipotha mbyoka itatu yokuhinga aantu ya longitha iikolitha yi pwaakenwe kaapanguli mboka yatatu, yo ya vule okutokola ngele epangulo miipotha mbyoka olili tuu mondjila, konima sho iipotha mbyoka yali yuundulilwa kompangu onene opo yi ka ningilwe omakonaakono.
Aalumentu mboka oyali ya monika ondjo nokupewa omageelo omolwa iipotha yokuhinga ya longitha iikolitha kwiikolelelwa kOmpango yoMoondjila nIiyenditho.
Advocate Danie Small, ngoka a kalele po Epangelo moshipotha shoka okwa ningi eidilo lyomeendelelo opo ku talululwe etokolo miipotha mbyoka, konima sho aapanguli mboka ya ningi etokolo.
Titus okwali a monika ondjo nokupewa egeelo lye mOmpangulilo yaKahandja, omanga Kasoma naKaruuo iipotha yawo yali ya pwaakenwa mOmpangulilo yaRundu.
Ompangu yoPombanda oya tokola kutya elombwelo lyEpangelo lyonomola 100 lyomo-2003 ndyoka lya gandja uuthemba opo kulongithwe uushina mboka inali gwanitha po iimbumbiwa ngaashi yuudhwa kotompolwa 82 (7) yOompango dhoMoondjila nIiyenditho yomo-1999, sho iipumbiwa mbyoka tayi utha opo kehe otutsa tayi kalongithwa meningilo lyomakonaakono aahingi taya fekelwa ya longitha iikolitha, opo yi kale ya gwanitha po iipumbiwa yoSouth African Bureau of Standards.
Omupanguli Nicolas Ndou okwali apulwa momwedhi Juli nuumvo, opo a gandje epitiko Epangelo li pataneke etokolo lyaningwa mOmpangu yaSwakopmund, moka omupanguli a li a tokola kutya elombwelo lyEpangelo eti-100 lyomo-2003 olya pitilila oonkondo dhooveta dhomoondjila.
Shika osha landula sho Omutseyiveta Raymond Heathcote, ngoka a li ta tamanekelwa oshipotha shokuhinga omanga a longitha iikolitha a ti ke n a ndjo moshipotha shoka.
Heathcote, okwa ningile omapulaapula ongushu yuushina wali wa longithwa pakutala ondjele yiikolitha molutu lwe omanga ina tulwa miipandeko moSwakopmund momasiku 27 gaAguste 2011, oshowo uukwaveta wElombwelo lyEpangelo lyomo-2003.
OVENDUKA FRED GOEIEMAN
