Mayola wodoolopa yaNgwediva Jason Asino okwa pandula ovakalimo vomomukunda Efidilomulunga molwaashi va yandja elongelokumwe lavo, va itavela okuhauluka omaumbo avo nomapya avo va yapukile exumokomesho.
Omukunda Efidilomulunga omo omo mwa tungwa endiki lokupungula nokulandifa oikwambidi noingumutulu la konekwa nedina Ongwediva Fresh Produce Business Hub, olo la yeululilwe komupresidende Hifikepunye Pohamba petameko lomudo woneudo.
Oshivilo shopambelewa shokutamekifa oilonga yendiki osha li ko mEtitano, na minista wounamapya, omeva nomakuti John Mutorwa oye a li omupopi a fimana.
Moshipopiwa osho sha yeshwa ponhele yaye komunashipundi welelo lodoolopa yaNgwediva Johannes Ya Kanandjembo, Mayola Asino okwa ti oshimaliwa sha longifwa mokutunga endiki osha hepuluka.
Okwa pandula epangelo ta ti ola ninga nawa lela eshi la hoolola Ongwediva onga onhele yendiki loikwambidi noingumutulu.
Asino okwa udaneka nokutya elelo lodoolopa yaNgwediva otali ka yandja omayakulo aeshe a pumbiwa.
Ta pandula Ngoloneya woshitukulwa shaShana Clemens Kashuupulwa, eshi a kala nokuyambidida exumokomesho loshitukulwa.
Ponhele opo pa tungwa endiki loikwambidi noingumutulu opa li omapya nomaumbo omiti, ashike ovakalimo ova udafana nelelo lodoolopa nova itavela okutembuka op ova yapukile exumokomesho.
Asino ota ti nee, otashi ka kala yo sha wapala nosha yuka opo ngeenge endiki tali kutu ovanailonga, li tale yo movakalimo vomEfidilomulunga.
ONGWEDIVA PLACIDO HILUKILWA
