Uukwamuhoko mopolitika owa nika oshiponga noonkondo nuuthikepamwe momalelo pokati kaakiintu naalumentu itawu ka eta iizemo yasha ngele wa tulwa miilonga.
Ngoka omaiyuvo gomutseyinawa gwopolitika, omunangeshefa na okwa li nale omuleli gwaailongi Hesekiel Nanyeni, a tseyika nedhina ‘Swapo’.
Pethimbo a ningilwa omapulaapulo koshifokundaneki shoNamibia Sun mOshakati, Nanyeni okwa pula aaleli ka ya thindile aakwashigwana kongudhi paku lombwela aakwashigwana ya hogolole aaleli kwiikwatelelwa kuukwamuhoko.
“Aantu mboka taya kambadhala okueta uukwamuhoko mopolitika yaNamibia otaya tukula onkalo ya nika oshiponga,” Nanyeni ta ti.
Nanyeni okwa tothamo Omuleli gwAadamara Chief Justus //Garoëb, ngoka kwa lopotwa a pula aalelwa ye ya hogolole Omupeha-Presidende gwOngudu yoSwapo Hage Geingob, pethimbo lyomahogololo taga ka ningwa momvula twa taalela molwaashoka anuwa omupopi gwelaka lyOshidamara.
Nanyeni, ngoka e li oshilyo shoSwapo okwa nyana woo aaleli yamwepo yoSwapo mboka ya tsu kumwe nomapopyo ga //Garoëb.
“Otandi tsu owala kumwe naElijah Ngurare ngoka a ti uukwamuhoko inawu dhana onkandangala momahogololo. Aaleli ka ye na oshinakugwanithwa shokulombwela aalelwa yawo kutya naya hogolole lye. Shoka sha ningwa kuChief //Garoëb oshi li elongitho lyoonkondo pambambo na oshi li oshiholelwa oshiwinayi mokati koshigwana,” Nanyeni ta tsikile ko.
‘Swapo’ ta tsikile ko ta ti, omapopyo woo kutya aapopi yelaka lyOshiwambo oya lela oshilongo uulethimbo nago oga nika oshiponga.
Nanyeni okwa nyana woo etulomiilonga lyekalele po lyuuthikepamwe poonkatu dhelelo ta ti omukalo ngoka itagu ka longa .
“Tse aakwashigwana otu uvite ko kutya aakiintu naalumentu naya talike ko ye thike pamwe. Otu uvite ko woo kutya ekalelopo poonkatu dhelelo dhi thike pamwe okuza koombinga adhihe mbali dhuukashike-ko-okantu oshinima oshiwanawa ihe oshi na oshilanduli sha nika oshiponga nge tashiya ketulomiilonga lyoshiyetwapo shoka. Ngele otatu hogolola aaleli yetu, inatu pumbwa okutala kuukashike-ko-okantu ihe natu tale kwaashoka omuntu ta vulu okuninga nonando shoka osheetitha ehogololo lyaakiintu owala nenge aalumentu. Ita tu vulu okukanitha aantu yongushu mboka taya vulu okulela oshilongo omolwa uuthikepamwe melelo molwaashoka eningo lyomahwahwameko guuthikepamwe melelo otali ka etitha aantu ya hogolole owala aantu mboka kaa ye na uukwatya wokulela oshilongo opo ku kwashilipalekwe kutya okwa gwa nithwa po ompango ndjoka tayi utha uuthikepamwe melelo,” Nanyeni ta ti.
Nanyeni okwa nyenyeta woo aanambelewa aakuluntu mboka haya lele oondoolopa nonando inaya hogololwa, ohatu hogolola ookansela yoondoolopa dhetu ihe oondoolopa otadhi kwatelwa komeho kAanambelewa Aakuluntu she etitha ookansela yetu mboka twa hogolola ya kale yaana oonkondo dhasha momalelo, pehala ookansela oyo ya lombwele aanambelewa aakuluntu shoka ye na okuninga aanambelewa mboka oyo taya gandja omalombwelo kookansela mboka oyo ya hogololwa koshigwana.
Category: