Aakwashigwana yamwepo mboka yali ya yi komatuntilo gopashigwana ngoka ge li metifa oyali ya shunithwa komagumbo okuza puupangelogona wumwepo mOshitopolwa shaShana omolwa ompumbwe yaaniilonga, nompumbwe ndjoka oye etitha uupangelo wumwe wu ninge owala omatuntilo uule womasiku gaali.
Omukomeho gwuundjolowele mOshitopolwa shashana Sakaria Taapopi, okwa lombwele oshifokundaneki shoNamibian Sun kutya otaya ningi oonkambadhala opo ya kwashilipaleka kutya aakwashigwana ayehe oya mona ekwatho lyontutila nonando oshitopolwa osha taalela ompumbwe yaaniilonga.
Pethimbo lyoshikonga shontutila tashi ningwa, aanona ayehe yeli kohi yoomvula ntano otaya tuntilwa opo ku keelelwe omukithi gwoPolio oshowo omukithi gwOshikwenyene na otaya pewa ovitamine A omanga aakuluntu yeli pokati koomvula 15 sigo 45 taya tuntilwa okukeelela omukithi gwoTetanus na otaya pewa oopela dhokukeelala uupuka mepunda oshowo omongwa gwOsololola.
Oshikonga shoka sha tameke mEtiyali na okwa tegelelwa shi hule nena inashi vula okuningwa muupangelogona awuhe mOshitopolwa shaShana molwa ompumbwe yaaniilonga.
“Uuna wu na ompumbwe oho vulu owala okuninga shoka to vulu okuninga, otwali twa pumbwa okuninga omalongekidho opo tu kwashilipaleke kutya oshitopolwa ashihe osha ningilwa omatuntilo,” Taapopi ta ti.
Omupangi pokaklinika kaNgwediva, ngoka a pula a gandje uuyelele meholamo, okwa lombwele oNamibian Sun kutya oya shunitha komagumbo aantu okutameka mEtiyali molwaashoka okapangelo hoka otaka gandja owala ontuntila okutameka ohela sigo onena.
Category: