Omunashipundi gwelelo lyoNamibia Development Corporation (NDC) okwa nyenyetelwa komuleli gwoshilongo konima sho kwa ndhidhilikwa onkalo yaaniilonga yakehe esiku yanaipala mopoloyeka yepangelo yOndama yaNaute mUumbugantu woshilongo.
John Nekwaya, ngoka a li oshitopolwa shosheendo shOmupresidende Hifikepunye Pohamba, pethimbo a talele po opoloyeka ndjoka mEtitano lya piti, okwa lombwelwa a thige po osheendo shomuleli konima sho Omupresidende a mono kutya elelo lyoNDC otali yakula nayi aaniilonga mopoloyeka ndjoka.
“Ngwee [Nekwaya] kushi we oshitopolwa sholweendo lwandje. Ino landula ndje we. Inandi hala okukumona walandula ndje molweendo nduka. Alikana kala kokule e toyi,” Pohamba ngoka a li a geya noonkondo osho a lombwele Nekwaya.
Omunashipundi gwelelo lyoNDC okwa thigi po ehala ndyoka ina popya sha.
Oshiningwanima shoka osha ningwa miipathi yOminista yIipindi nIikwafambulika Calle Schlettwein, Ominista yUunamapya John Mutorwa, Ominista yUuyuuki Pendukeni Iivula-Ithana, Ngoloneya gwOshitopolwa sha//Karas Bernardus Swartbooi oshowo Omukwatakanithi gwOngudu yoSwapo mOshitopolwa sha//Karas Matheus Mumbala.
Omupresidende okwa pula wo aathaneki yehangano lyoNamibian Broadcasting Corporation (NBC) pamwe naatoolinkundana yalwe ya thaneke omunashipundi gwaNDC.
Nekwaya okwali a gandja oshipopiwa oshifupi kombinga yaashoka sha pondolwa po mopoloyeka ndjoka oshowo oompangela dhopoloyeka omanga Pohamba ina ka tala nkene iilonga tayi longwa mopoloyeka.
Pethimbo lyolweendo, Pohamba okwa hokolola kutya onkalo moka mu na aaniilonga yopoloyeka ndjoka ya thika po-500 itayi idhidhimikilwa.
Ongudu yaantu 10 ohaya zi mondunda yimwe ndjoka ya nuninwa owala okukala aantu yane.
Aaniilonga yamwe ohaya zi mootenda mbali omolwa ompumbwe yomahala gokuza nonando opoloyeka ndjoka ya yama kepangelo oya kala nokuninga iiyemo oyindji oomvula dha piti pakulanditha iiyimati hayi longwa mopoloyeka ndjoka momalanditho gopondje yoshilongo, ngaashi miilongo yaEuropa oshowo moSouth Afrika.
“Onda mona kutya aantu mboka otaya ningwa nayi kelelo lyaNDC. Otashi uvitha ndje nayi noonkondo mokumona aantu mboka ya hogolola ndje nokutula ndje koshipundi taya ningwa nayi. Shika osho oshikando shandje shotango okumona aaniilonga yopoloyeka yayama kepangelo yeli monkalo yanayipala. Omolwashike aaniilonga oyendji ngaaka ye na okutulwa mondunda yimwe? Niikombo ihayi vulu okutulwa mumwe ngaaka, onkalo ndjoka oya pumbwa okumona ehulilo meendelelo ,” Pohamba ta ti.
Mopoloyeka ndjoka ka mu na endiki lyuundjolowele nenge okapangelogona kaaniilonga pamwe nuunona wawo naamboka taya ehama ohaya falwa kOkaiti, oshinano shookilometa 50 okuza pehala ndyoka. Ka pe na woo oskola yaanona nonando opoloyeka ndjoka oya kala miilonga okutameka omvula yo-1990.
Ekwatathano lyiilonga pokati kaaniilonga nelelo lyaNDC olya nkundipala molwaashoka aaniilonga ohaya kuthwa miilonga ngaashi elelo ndyoka li uvite, nonando iilonga mopoloyeka ndjoka otayi pula nawa komeho nehangano olya kala nokuninga iiyemo yili pombanda uule womimvo ntano dha piti. Aaniilonga mopoloyeka ndjoka oya kutwa kokondalaka yomweedhi gumwe ndjoka haya shaina kehe omwedhi.
Ngoka ta longo pehala lyOmunambelewa Omukuluntu gwaNDC okwa uvaneke Omupresidende Pohamba kutya onkalo yaaniilonga otayi ka hwepopalekwa muule woomweedhi hamano twa taalela.
Category: