Iilonga yopolisi molukongo netulo miipandeko lyomulumentu ngoka ta feekelelwa edhipago lyomunamivo 28, Helena Shivute ngoka a dhipagwa oshiwike sha piti, otalu tsikile naShivute okwa fumbikwa mEtilyasa popepi nOkahao ohela.
Omupopiliko gwopolisi yaMusati, Hesekiel Hamalwa okwat,i opolisi monena oyi na uumbangi wakola mboka tawu ulike kutya omufekelwa okwa holama momundhingoloko gwaShikango mOshitopolwa shaHangwena.
“Ina tulwa natango miipandeko ihe olukongo otalu tsikile na otatu longitha uuyelele kehe tatu mono opo tu kale twe mutula miipandeko,” Hamalwa ta ti.
Opolisi oya ti, omufekelwa okwa ningi omadhengo gongodhi, alongitha ongodhi ye yopeke momundhingoloko gwaShikango muule womasiku ga piti.
Omulumentu ngoka ta fekelelwa oshipotha shedhipago oye he yokanona kanakusa koomvula ne, Esther, hoka ka mono nkene he ta dhipaga yina na oka tondoka opo ka ka konge ekwatho kaashiinda uusiku mboka.
Omufekelwa okwayi ontuku okuza pehala lyoshiningwanima na okwa lopotwa a tumine omukwanezimo gwanakusa okatumwalaka okafupi, moka a ningi omatilitho kutya ota kiidhipaga.
Yinagona yaShivute, Lahja Nangombe, okwati okwa yakula okatumwalaka okafupi okuza komufekelwa hoka kati “mu fumbika. Okwa eta uuwehame owundji nangame otandi kiidhipaga woo.”
Lyopokati mpoka osha zimo kutya Shivute okwa kala a tila, konima sho ahololele aapopepi naye kutya omwenyo gwe oguli moshiponga omolwa omunamukunda gwawo omukiintu ngoka a tameke ta taandelitha oohapu dhaana uukwashili kombinga yaShivute.
Shivute okwa nkapwa sigo omeso, sha ningilwa mondunda ye yokulala momasiku 13 gaFebruali, konima owala yoshiwike shimwe sho Ominista yOmauyelele Joel Kaapanda, ya holola omaiyuvo gawo gonayi omolwa omwaalu gwomiyonena dhopaukashike kookantu nomadhipago ngoka taga ningilwa aakiintu tadhi londo pombanda mOshitopolwa shaMusati.
OSHAKATI PLACIDO HILUKILWA