Ehangano lyaashi lyopapangelo olya ti, aalongi yomiyonena ndhoka tadhi ningilwa aakiintu moshilongo oya yi kokule noonkondo na oya pumbwa okwiiwa moshipala. Ehangano lyoWomen’s Action for Development olya yambidhidha eidilo lya ningwa opo Omupresidende Hifikepunye Pohamba a ninge etseyitho lyonkalo yopaulumompumbwe opo ku vulwe ku ungaungwe nomadhipago ngoka taga ningilwa aakiintu kaalumentu mboka yeli nenge yali nayo momakwatathano gopahole. “WAD ota holola omaiyuvo ge gonayi, ehaluko na ota nyana noonkondo omukalo gomadhipago ngoka,” Omukomeho gwoWAD Veronica de Klerk ta ti. Iilyo yolutu lyoNational Council’s Women Caucus oya ningi eidilo mOmaandaha opo omupresidende a tseyithe onkalo ndjoka. Omunashipundi gwolutu ndoka Margareth Mensah-Williams okwati, aafekelwa miimbuluma mbyoka inaya pewa oompito opo yiifutilemo moondjeedhililo ta pula woo egandjo lyomageelo omanene kwaamboka taya monika ondjo miipotha mbyoka. Sho a popitha iikundaneki ohela, De Klerk okwati, otaya indile nesimaneko meendelelo opo omupresidende a pulakene kelilagano lyaakiintu noku ya kwathela paku ninga shoka taya pula. De Klerk okwa tsikile ko ta ti, aantu oyendji ohaya kala ya kumwa noonkondo uuna taya lesha nenge taya pulakene kombinga yoonkundana dhomadhipago ngoka ihe ohaya kala owala ya mwena molwaashoka iimbuluma mbyoka oya ninga omukalondjiigilile moshilongo. De Klerk, okwa pula opo oonakumonika ondjo miimbuluma mbyoka ya pewe omageelo gankondopekwa ngaashi elongo lyiilonga iidhigu nokushonopeka omatalele po okuza kaakwanezimo yawo. Okwati, oshikumungu shomiyonena ndhoka nashi tulwe momusindalandu gwelongo moshilongo yo aanona yaamati taya longwa okusimaneka aakiintu. De Klerk, okwa pula oshikondo shopaumwene, Epangelo niiputudhilo yilwe yi tule miilonga ooprograma dhowina ndhoka dha nuninwa okulonga aaniilonga aalumentu kombinga yuuthemba waakiintu kwiikolelelwa kekotampango lyaNamibia. “Pethimbo lya faathana nesimaneko otandi pula iiputudhilo mbyoka yi tule miilonga meendelelo ooprograma dhowina dha nuninwa aaniilonga aakiintu nkene ye na okuyanda omiyonena nenge ya ningilwe omadheulo gokwiigamena ihe ha paku hwahwameka omiyonena ihe eigameno owala lyopaumwene,” De Klerk ta ti. WAD oya pula woo opo oondunda dhomanwino dhi kale hadhi pata potundi onti-18:00 dho tadhi patuluka ishewe po-23:00 konima shoo aanona ya ka lala opo aalumentu ya mone ethimbo lyokukala pamwe naanegumbo lyawo.
Category: