Omadhipago mokati kaaholathani ogeli oshizemo nomadhidhiliko goshigwana shoka sha ekelahi oonkuluhedhi dhasho oshowo e yo pombanda lyokwiikaleka kokule naKalunga.
Ngoka omaiyuvo gomuleli gwopamudhigululwakalo nopambepo sha landula oshiningwanima oshinene shedhipago neteto lyomutse lyomunyasha omunamivo 24, Mirjam Nandjato, ngoka a dhipagwa mOshakati oshiwike sha piti.
Elenga enene lyUukwambi, Tatekulu Herman Iipumbu olya ti otaya ka ninga omutumba oshiwike tu li opo ya vule oku kundathana onkalo ndjoka yomadhipagathano mokati kaaholathani.
“Otwa taalela uupyakadhi uunene mboka wa pumbwa oku kundathanwa kEpangelo, aaleli yopamudhigululwakalo oshowo omahangano goongeleka ,” Iipumbu ta ti.
Iipumbu okwati ondhino yomidhigululwakalo oshowo e yo pombanda lyelongitho lyiingangamithi niikolitha oyo tayi etitha unene uupyakadhi mboka.
Omusita Paulus Christian gwOngeleka yaedhina Full Gospel Church of God okwati “Ngoka omadhidhiliko taga ulike kutya eso monena olya ninga ombiliha molwaashoka tse aavali inatu simanekwa we naanona yetu ihaya tila we Kalunga. Otwa kutha po elongo lyombimbeli moosikola dhetu oshowo momagumbo getu. Uuna Kalunga ina simanekwa nena omuntu kehe ota vulu okuninga kehe shoka omaiyuvo ge ta ge mupe nonando otashi etitha a ye pondje uuthemba waantu yalwe,”.
Elenga mOshikandjo shaHaingu Nghidinihamba Ndilula, okwa holola kutya edhipago lyaMirjam etilithi noonkondo. “Omuntu gumwe ito hala nokuli okushi dhilaadhila ihe ka tu na shoka tatu vulu okuninga molwaashoka osha ningwa nale,” Ndilula ta ti.
Ndilula okwati, iiyetithi yomadhipago ngoka ka yi shiwike natango ihe pamaiyuvo ge oku wete kutya omadhipagao ngoka otaga etithwa kompumbwe yohole yashili oshowo kaantu mboka haya yi momakwatathano ina yiilongekidha nawa.
“Aanyasha oya pumbwa oku tsuwa omukumo opo ya ye moondjokana molwaashoka uuna aantu taya yi moondjokana ohaya pewa omapukululo goondjokana. Aanyasha oyendji otaya yi momakwatathano nookume kawo mboka ya tsakanene nayo moondoolopa omolwa omaliko nonando ka pe na ohole. Shoka otashi e ta uupyakadhi uunene,” Ndilula ta ti.
Omukomeho gwOlukanda lyaShoopala mOshakati, Lisias Mutileni okwa nyana omadhipago ngoka na okwa pula aanyasha opo ya kale ya tonata uuna taya yi momakwatathano goludhi ndoka. “Uuna tashi ya komadhipago ngoka, aakiintu oyo taya pewa uusama molwaashoka otaya ya yi momakwatathano ya posipala,” Mutileni ta ti.
Mutileni okwa gwedha po ta ti, omainyanyudho nuuthenba owo tawu etitha natango omadhipago ngoka molwaashoka iinima mbyoka itayi kwatelwa we komeho koompango dhopamudhigululwakalo.
“Monale aaholathani oyali haya talika koondjokonona dhawo, naanyasha ohaya lombwele nokuka konga woo omayele okuza kaavali, ihe monena aanyasha otaya ningi owala omatokolo gawo kuyo yene na ihaya lombwele aakuluntu,” Mutileni ta ti.
Bernadette Millanda, omukalimo gwomOmpumbu okwati okwa geya noonkondo kedhipago lya ningilwa Mirjam ihe okwa si woo ohoni mokuuva kutya nakusa oye a li ta futu ondunda ndjoka yali hayi hiilwa komutamanekwa na okwa kala woo te mu pe omakwatho nonando ina tseyithila aakwanezimo ye. Millanda okwa pula ku ningwe omutumba gwopashigwana opo ku vule okwiikunda uupyakadhi mboka.
OSHAKATI PLACIDO HILUKILWA