Omusita ngoka a kwatele komeho efumbiko lyomunamimvo 24, Mirjam Nandjato, ngoka a dhipagwa nokutetwa omutse oshiwike sha piti mOshakati komumati gwe, okwa nyenyetele aanyasha kutya otaya thigi po Kalunga nokulambalala omakwatathano gopainternet, oofelema oshowo omukalo gwokuza pamwe omanga inaya ya natango moondjokana.
Nandjato okwa fumbikwa mOlyomakaya ga piti mOngwediva.
Aalilisa omathele mwakwatelwa Kansela gwaNgwediva Vinia Abisai, oya kala pefumbiko lyaNandjato ndyoka lya ningilwa mOngeleka yaElcin mOngwediva.
Omusita Arvid Shalongo ya Shalongo, pethimbo a popi poshituthifumviko shoka okwati, edhipago kehe lyoludhi ndoka otali uvitha nayi noonkondo, na okwa dhimbulukitha aanyasha kutya oyiiteka Kalunga nopehala ohaya kala owala komakwatathano gopainternet ngaashi oFacebook oshowo okukala taya tala oofelema pehala lyokuya komalongelo Kalunga noku kuuva ohapu yaKalunga.
Omusita okwa nyana woo onkalo yoku otekathana tayi ningwa kaanyasha kutya onkalo ndjoka otayi fala owala miiningwanima ngaashi shoka sha ningilwa Nandjato.
Mondjokonona ye Nandjato okwa hokololwa kutya okwa li okanona okawanawa hoka kali ke hole okuteleka.
Nakusa okwa dhigako yina, oshowo aamwayina yaheyali omanga he a hulitha nale mo-1996 pethimbo Nandjato a li owala e na oomvula hamano.
Lwopokati mpoka omumati gwaNandjato ngoka ya kala naye ethimbo, Ananias Ekongo Nailenge, okwa zimine mEtitano pethimbo a holoka komesho yOmpangu yaMangestrata mOshakati kutya oku na ondjo moshipotha shedhipago linyanyaleka shoka ta tamanekelwa.
Sho a pulwa kOmupanguli Mika Namweya kutya omolwashike ta ti okuna ondjo, omunamimvo 24 okwa yamukula ta ti “Molwaashoka ongame nde mu dhipaga.”
Nailenge ngoka a tokola okwii popila ye mwene mompangu, okwa lombwele woo ompangu nkene a tsu tango Nandjato nombele omanga ina teta omuligu shoka sheetitha eso lye meendelelo.
Sho a hokololele ompangu ndjoka yali yuudha aakwanezimo lye oshowo aakwanezimo yanakusa, Nailenge okwa popi kombinga yekwatathano lyawo ndyoka lya li lya nkundipala ndyoka olyo lyafala sigo omeso, sha landula oontamanana pokati kaaholathani mboka yaali mondunda yomutamanekwa mOshakati shomUuzilo .
Nailenge okwati “Otwali ka tu uvitathane na okwa kala aluhe ta ningilendje omatilitho gesso. Mesiku ndyoka nde mu dhipaga okwali ta kondjo nangame na okwa ningilendje natango omatilitho geso na onda tokola opo ndi mudhipage.”
Sho a pulwa kutya okwa hala okutya ngiini sho ta ti Nandjato okwali te mu ningile omatilitho geso, Nailenge okwa yelitha kutya nakusa okwali aluhe te mu ningile omatilitho geso nenge ta ningile omatilitho geso okanona ke hoka a mono noomukiintu gulwe pethimbo mboka yaali ya topoka paufupi mo-2012.
“Oye a tameke ta kondjo nangame tango. Sho e ya mondunda yandje otwa tameke tu na oontamanana na okwa tameke ta kondjithandje. Onda geye noonkondo nelalakano lyandje ka lyali oku mudhipaga,” Nailenge ta ti.
Omukaleli po gwEpangelo moshipotha shoka Leonard Tjiveze, okwati Epangelo itali ka popila opo Nailenge iifutilemo mondholongo uuna a ningi eidilo. Oshipotha shika oshuundulilwa komasiku 23 Apilili nuumvo opo opolisi yi vule okumanitha omakonaakono moshipotha shika.
Namweya okwa tseyitha woo kutya oshipotha shika otashi ka tumwa kOmbelewa yOmupanguli-Ndjai opo a ka ninge etokolo.
Nailenge ota kala mondholongo.
ONGWEDIVA MERJA IILEKA