Omulumentu gwomOshakati ngoka a tete omukiintu gwe omutse konima sho emu tsu nombele, okwa holola komeho gomupanguli kutya oyali taya nyenyeta shalandula sho omukiintu ngoka a ningi omatilitho kutya otaka ehameka okanona komulumentu ngoka hoka e na nomukiintu gulwe.
Konima sho a tsu nombele nokuteta ko omutse gwomukadhona gwe, Mirjam Tuyakula Nandjato gwoomvula 24, omutamanekwa okwa yi ontuku okuza pehala lyoshiningwanima shoka sha ningwa omutenya gwEtiyali, na okwa ningi omadhengo goongodhi gontumba ta tseyithile aantu omuyonena ngoka a longo nokonima okwakambadhala oku idhipaga, ihe oonkambdhala dhe odha ponyo.
Nakusa ngoka kwa lopotwa kutya okuli omukwatheli molabora yoNamibia Institute of Pathology mOshipangelo shaShakati, okwa tsuwa tango nombele nokonima okwa tetwa omutse ngoka gwa adhika ponkololo yondunda moka a dhipagelwa omanga olutu lye lwaana omutse lwa adhika lwa dhingilwa momalapi pombete.
Konima yoshimbuluma shoka omutamanekwa okwa ende oshinano shookilometa 60 sigo okomukunda gwaandjawo mOkalongo na okwa kambadhala okwiimangeleka ihe oonkambdhala dhe odha ponyo sho oshitayi shoka a mangele ondhalate ndjoka a kambadhala okwi idhipaga nayo sha teka na okwa yi puundingosho wopopepi mpoka a tulilwa miipandeko kopolisi ongulohi yEtiyali, sho a adhika ta nu omalovu.
Momushangwa gwe ohela, omutamanekwa okwa holola kutya oya tameke ekwatathano lyawo lyopahole naNandjato mo-2005 ihe oyali ya hulitha po ekwatathano lyawo kuyelele omvula ya piti.
Pethimbo ya hulitha po ekwatathano lyawo omutamanekwa okwa gandja etegelelo komukiintu gulwe ngoka a pulumutha okanona omvula ya piti.
Pahapu dhomutamanekwa ngoka omunamivo 24, ngoka ita vulu okutumbulwa kedhina sigo a holoka mompangu nena, yo naNandjato oya tokola okwiishunina pehulilo lyomvula ya piti ihe sho yi ishunine Nandjato okwa kala ta nyenyeta kutya omutamanekwa okuhole okanona ke shi vuluthe ye, na okwa ningi omatilitho kutya ota kwashilipaleke kutya ye ( omutamanekwa) pamwe nokanona ke oya adhika kuupyakadhi.
Mesiku lyoshiningwanima shoka omutamanekwa okwali a yi kOutapi opo a ka holoke mompangu omolwa oshipotha sheehameko oshikulu.
Omutamanekwa okwa tsikile kutya, Nandjato okwa li a geya noonkondo molwaashoka omutamanekwa okwa yi kOutapi nonando oshipotha she oshi li ko esiku lya landula na okwa pula opo a galuke ye a kuthe mo iinima ye mondunda yomutamanekwa.
Omutamanekwa okwa tsikile kutya oya tameke natango taya nyenyeta mondunda ye yokulala, naNandjato natango okwa ningi omatilitho kutya otaka dhipaga okanona komutamanekwa, nokonima okwa dhenge omutamanekwa nondjato ye yopeke, ta tsikile ta ti konima okwe mu tsu nombele na okwa teteko omutse gwe.
Konima yokulonga oshimbuluma shoka oshinyanyaleki omutamanekwa okwa thigipo ondoolopa ihe okwa dhengele aantu yontumba teya lombwele kombinga yoshimbuluma a longo.
Yamwe po yomaantu a dhengele omushiinda she Nangula Andjamba.
“ Okwa lombwele ndje kutya nandi ye kondunda ye, otandi a dha ko olutu lwaMirjam ngoka a dhipaga. Onda dhilaadhila kutya omolwashika e na okuninga omashendjo goludhi ndoka.”
“Onda endelele opo ndi ye kondunda ndjoka nda adha ya pwatwa konima sho ya egululwa olutu lwa Mirjam olwa li menkunku lyombinzi nomutse gwe gwa tetwa ko kolutu,” Andjamba a hokolola.
Aaniilonga pamwe nanakusa oye muhokolola kutya okwali omuniilonga omunandjungu nomwiinekelwa na oya haluthwa noonkondo keso lye.
Mboka ya gongala pehala lyoshiningwanima oya hokolola kutya omutamanekwa okwali omuhingi gwotaxi ihe okwa kala ethimbo ele keena iilonga nanakusa oye a kala he mukwathele nokufuta woo ondunda ye ndjoka ha hiila.
Aakwanezimo ya nakusa oya haluthwa woo keso lye na oya holola kutya kaya li yeshi ngele okuli mekwatathano
lyopahole.
Category: