Opolisi oya dhimbulula aantu yahamano yomaantu yaheyali mboka ya hulithile moshiponga sha holoka pokati kaKahandja naTjiwarongo ongulohi yEtiyali.
Ombesa yahumbata aaniilonga yEhangano lyaNamdeb ndjoka yali molweendo okuza mOshomeya (Tsumeb) okuya kOrange, oyiidhenge mumwe neloli lya humbata iikunwa yEhangano lyoNamibia Dairies.
Oshiponga shika osha ningilwa oshinano shookilometa 25 mOnooli yaKahandja lyopotundi 19:30 naantu omulongo oya ehamekelwa moshiponga. Ayehe mboka ya hulitha okwa lopotwa kutya aalumentu.
Oonakusa mboka yadhimbululwa, oya tumbulwa komadhina kutya omushingi gweloli Fablius Nangaku omunamimvo 40, omuhingi gwombesa Robert Bekker, 43, Hendrik van Wyk, 54, naAndalika Vilho, 59. Yaali yomwaamboka ya dhimbululwa inaya vula okutumbulwa komadhina molwaashoka aakwanezimo yawo inaya tseyithilwa natango.
Omupopiliko gwopolisi yaTjozondjupa Sergeant Maureen Mbeha, okwa indile oshigwana opo shi kwathele opolisi mokudhimbulula omudhimba ngoka inagu dhimbululwa natango tagu adhika mokila yopolisi yaVenduka.
Mbeha okwa kumagidha woo aahingi yiiyuthe koompango dhomoondjila opo kuyandwe iiponga.
OVENDUKA OMUTOOLINKUNDANA GWOMENI