Ehangano lya pewa otendela yokuwapaleka oshiputudhilo shaUnam moshitayi shaHifikepunye Pohamba mOngwediva otali tamanekelwa okutidha miilonga aaniilonga shaali pamilandu ngaashi tashi uthwa kooveta dhaaniilonga.
Aaniilonga nale yEhangano lyoIndustrial Cleaning Service, oya ti elelo lyehangano ndyoka olya longitha efudho lyiituthi yomatango omanene opo li kuthe miilonga etata lyaaniilonga mboka ya longele ehangano ndyoka moHifikepunye Pohamba Campus, ina li landula oompango.
“Otuuvite nayi omolwa oshiningwanima shika. Esiku twa pata opo tu ye mefudho otwa pewa oofoloma dhomaidilo giilonga opo tudhi udhithe, osha ningwa meendelelo na ina tu pewa omauyelele nenge omatompelo gasha,” omukaleli po gwaaniilongaomugoyi mboka ya kuthwa miilonga ta ti.
Omukaleli po ngoka okwa ti momasiku 15 gaJanuari, ku na owala esiku limwe opo ya tameke iilonga oya tuminwa okatumwalaka okafupi okuza komukomeho gwawo Alvin Bester, ngoka e ya tseyithile kutya omaidilo ngoka ya ningi inaga tambulwa.
Aaniilonga ya kuthwa miilonga oya kambadhala okuninga ekwatathano nOmukomesho gwehangano ndyoka mOvenduka, Monika Kohima ihe okwa tindi okupopya nayo na okwe ya kunkilile opo ka ya dhengele we ongodhi ye.
OIndustrial Cleaning Service oya li ya pewa otendela yuule woomvula ndatu koshiputudhilo shoka muJanuari gwo-2011, notendela ndjoka oya hulu momasiku 31 gaDesemba.
“Ehangano olya ningulula eidilo na olya sindana po natango otendela ndjoka ihe elelo lyehangano olya tokola okukutha miilonga aaniilonga shaali pampango. Ehangano ndyoka tali ihumbata momukalo ngoka inali pumbwa okumona ootendela dhoshigwana. Ota tu pula opo tu pewe iilonga yetu meendelelo nenge ota tu ka gandja omaiyuvo getu opo okondalaka ndjoka yi hulithwe po,” aaniilonga ya ti.
Aaniilonga oya ti ayehe oye li aaniilonga taya kalelele na oya longela ehangano ndyoka uule woomvula ndatu.
Monena ehangano ndyoka olya kutu miilonga aaniilonga aape mboka ya pingenepo aaniilonga mboka ya kuthwa miilonga.
Sho a ningilwa omapulaapulo kombinga yoshiningwanima shika, Alvin Bester ngoka e li omukomesho gwehangano ndyoka moHifikepunye Pohamba campus okwa ti, aaniilonga ayehe oya li ya lombwelwa kutya okondalaka ndjoka oya thika pehulilo nehangano olya ningulula eidilo ndyoka lya taambiwa ko ihe aaniilonga ayehe oye na okuningulula omaidilo giilonga naye a kwatelwamo.
Omukomesho gwehangano ndyoka Monica Kohima, okwa ti “Iilonga yaaniilonga mboka oya pupo sho okondalaka ndjoka ya thiki pehulilo naasho ehangano lya sindana po natango ishewe otendela, ehangano olya pititha oompito dhiilonga oompe dha nuninwa aaniilonga aakulu naamboka aape, naayehe mboka yahala oompito dhoka oya pumbwa okuninga omaidilo. Aaniilonga yamwe po aakulu oya zimo momaidilo ga ningwa omanga yamwe inaya ziminwa we,”.
Omukaleli po gwEhangano, lyoNamibia Wholesale and Retail Workers Union (NWRWU) Primus Josef, okwa ti omukalo ngoka gwa longithwa kehangano ndyoka ka gu li mondjila naaniilonga oya kuthwa miilonga shaali paveta. “Ota tu ka katuka oonkatu. Ehangano ndyoka na li shune miilonga aaniilonga mboka nenge li ya pe omauwanawa guudha po,” Josef ta ti.
Omukaleli po gwoNWRWU okwa ti uuna okondalaka ya thiki pehulilo aaniilonga oya pumbwa okulombwela pamukalo nokupewa omauyelele yo taya pewa omauwanawa ngoka yiilongela.
OSHAKATI PLACIDO HILUKILWA