Omukanka ngoka tagu adhika popepi nOnesi mOshitopolwa shaMusati, ogwa longululwa sho aaniimuna oyendji ya kanitha omaliko gawo giimuna omolwa ontopo onene ndjoka ya kala momukanka ngoka. Kakele kokuhwika po omwiidhi ngoka gwa kala momukanka ngoka na ogwe shi ningitha oshidhigu okumona omahala ngoka ga nika oshiponga momukanka ngoka, okwa tulwa woo ondjila yomeya ya za mEtaka okuya mUuvudhiya.
Etokolo lyokulongulula omukanka ngoka olya ningwa sha landula sho iimuna oyindji ya si, unene oongombe dhoka dha tindile montopo ndjoka pethimbo tadhi kongo omeya omolwa oshikukuta oshinene sha dhenge oshilongo omumvo gwa piti.
Iimuna ya tindile montopo ndjoka, oyeethiwa na oya sile mo molwaashoka aantu nayo itaya vulu okuyi hilamo mo, molwaashoka otashi tula woo omwenyo dhawo moshiponga.
Aaniimuna mboka yeshi pondola okukutha mo iimuna yawo montopo, oyali ya futu aaniilonga mboka ye ya kwathele opo ya vule okukutha mo iimuna yawo.
Omvula ya piti Ngoloneya gwOshitopolwa shaMusati, Sophia Shaningwa okwali a nyana Ehangano lyoNamwater sho lya ndopa okupomba omeya opo gaye momukanka ngoka nendopo ndyoka olya tula moshiponga oomwenyo dhaakwashigwana.
Aakwashigwana ye li popepi nomukanka ngoka hagu tondoka omeya oshinano shookilometa 200, okupita mOshitopolwa shaMusati okuya mOshitopolwa shaShana nOshikoto ohaya longitha omeya gomukanka ngoka mokutekela iikunwa yawo nokunwetha iimuna yawo oshowo okukwata oohi.
Konima nkene omukanka ngoka gwa longululwa pehulilo lyomvula ya piti inaku lopotwa ekanitho lyiimuna onga oshizemo shontopo momukanka ngoka.
Category: