Omulumentu a monika ondjo momwedhi Novemba omvula ya piti noku pewa egeelo lyokukala mondholongo uule woomvula o-50 konima sho ayaha okusa aakiintu yaali moMalinda momwedhi Mei momvula yo-2009 ota pula opo egeelo a pewa li yulululwe.
Omunamimvo 35 Salmon Nakale okwa holoka mOmpangu yOpombanda mOvenduka ongula yohela komesho yOmupanguli Alfred Siboleka nepwaakeno lyeidilo lye otali ningwa momasiku 21 gaKotomba nuumvo.
Esiku ndyoka olya tokolwa kOmupeha Omupanguli-Ndjai Antonia Verhoef nOmukalelipo gwoPaveta gwaNakale Titus Ipumbu.
Nakale okwati ompangu oya ningi epuko pethimbo a pewa egeelo.
Nakale okwa monika ondjo momasiku 24 gaAguste 2012 moshipotha shedhipago lyomukadhona gwe omunamimvo 22, Rebecca Katana oshowo mumwayinakadhona gwaKatana, Lucia Erastus, gwoomvula 31. Omulumentu ngoka okwa yaha okusa aakiintu mboka yaali momasiku 9 Mei, 2009 mOlukanda lwaOmbili moMalinda mOshitopolwa shaHardap.
Katana okwa hulithile pehala lyoshiningwanima omanga Erastus a hulithile mOshipangelo shEpangelo moMalinda omolwa iilalo yooholo konima yoowili onshona sho a falwa koshipangelo hoka kopolisi.
Nakale okwa pewa oomvula o 30 mondholongo medhipago lyaKatana omanga a pewa oomvula 20 medhipago lya Erastus.
"Omahokololo gomaumbangi ga gandjwa koombangi dhEpangelo moshipotha shika otaga tsu kumwe, onkene Epangelo olya gandja omatompelo taga ulike kutya ngoye Nakale owa dhipaga aakiintu mboka yaali. Owa dhipaga aakiintu mboka omolwa uukodhi," Siboleka a ti pethimbo a gandja egeelo kuNakale. Ompangu oye ekelehi omaipopilo gaNakale kutya aakiintu mboka yaali oya yahwa pamupya shoo oshikuti sha zi kondjembo pethimbo a li ta kondjele ondjembo naKatana.
Nakale okwa tindi okuzimina ondjo moshipotha konima nkene oshipotha she sha tameke momwedhi Kotomba 2011.
Uumbangi wumwe po wa gandjwa moshipotha shoka owa holola kutya Nakale okwa tulwa miipandeko kopolisi konima sho a lombwele omumwayinamati Simpson Nakale opo a lombwele opolisi mpoka ta adhika konima yesiku limwe sho omadhipago ngoka ga ningwa.
Opolisi oya adha Nakale meyalandjandja tali adhika popepi noGibeon popepi nehala a dhigi ehauto lye konima yoshiningwanima shoka.
Ipumbu okwa kalele po Nakale kelombwelo lyOshikondo shOmayakulo gOpaveta mUuministeli wUuyuuki.
OVENDUKA NAMPA