Omupresidende gwoTUN, Mahongora Kavihuha okwa pula aalongiskola kaya shaine omikanda tadhi utha enano lyoondjambi dhawo kUuminiteli wElongo omolwa ekuthombinga lyawo menkanka lya li lya ningwa omvula ya piti.
Kavihuha okwa ningi enkukililo ndyoka sha landula egandjo lyomikanda tadhi lombwele aalongiskola kombinga yomwaalu gwiimaliwa tayi ka nanwa koondjambi dhawo konima shoo ya ndopa okuholoka kiilonga pethimbo yali taya ningi menkanka.
Kavihuha okwa lombwele oshikundaneki shoNamibian Sun kutya enano lyoondjambi dhaalongiskola mboka ka li li pauyuuki nopampango na otali yi pondje Ekotampango lyaNamibia, Oveta yAaniilonga oshowo Oveta yAaniilonga yEpangelo.
Pahapu dhaKavihuha pAveta yAaniilonga omugandji gwiilonga ota vulu okuhogolola opo a kale ina futa aaniilonga uuna inaya longa ihe uuminiteli owiidhimbike oveta ndjoka na owa tokola okufuta aaniilonga oondjambi dhawo dhiihwa po pethimbo ya ndopa okuya kiilonga onkene okunana oondjambi dhaaniilonga ka shi li pauyuuki molwaashoka oveta inayi popya kombinga ngele oondjambi dhaaniilonga otadhi vulu okunanwa monkalo yi li ngaaka.
TUN okwati enano lyoondjambi dhaaniilonga ka li li paveta kutya enkanka olyali paveta nenge ka lya li paveta.
Epangelo olya ndopa okulandula omilandu dhomondjila noveta yaaniilonga oya tothamo omilandu adhihe dhina okulandulwa uuna kwa ningwa enkanka lil li paveta nenge ka li li paveyta," Kavihuha ta ti.
Ohela aalongiskola yamwe mOskola ya Ella Du Plessis High School oya ti aakuluntuskola otaya longitha omatompelo ga nathangwa opo aalongiskola mboka ya katukilwe onkatu. Kombinga yomapopyo ngoka Kavihuha okwa gwedha po ta ti ehangano lyawo oli na uuyelele kombinga yaalongiskola mboka yali taya gandja omauyelele ga puka ngaashi omapopyo kutya aalongiskola yamwe oya tindi oku ka tala oombapila dhekonaakono lyondondo onti-10 no-12 ihe monena otaya ti oyali menkanka.
WINDHOEK FAITH SANKWASA
Category: