OSHAKATI PLACIDO HILUKILWA
Ovawiliki vokakomitiye oko ke liluka NamRights Revolutionary Committee ova pitifa omushangwanghundana mOshakati tava shiivifa nokutya oshipofa osho va li va patululilwa komukulunhuwiliki woNamRights Phil ya Nangoloh, osha kufwa mo momusholondodo woipofa mOmhangulilo yopombada.
Omunashipundi wokomitiye, Festus Damomwene Shaduva, okwa ti oshipofa osha li onghendabala yaPhil ya Nangoloh yokumweneka aveshe ovo vehe uditile ombili ewiliko laye loukanyamukulwa.
Shaduva pamwe na vakwao vaheyali ova patululilwa oshipofa ku ya Nangoloh tava pewa etimba nokutya ova kakeka edina lomukulunhuwiliki wehangano loufemba womunhu.
Shaduva oye a li nale omuwiliki wombelewa yoNamRights mOshakati.
Shaduva okwa ti oshipofa osho va patululilwa osha tendwa mo momusholondodo woipofa ya teelela okupwilikinwa momhangu konima eshi Norman Tjombe, omukalelipo wopaveta waumwepo wovatamanekwa Tangeni Nuukwawo, a ninga eindilo oshipofa shi ekelweshi.
"Otwa pandula etokolo lOmhangulilo yopombada nohatu halele hahende Tjombe omayambeko molwa eyakulo laye liwa," osho Shaduva a ti.
Okwa ti eshi osho oshikando shitivali ya Nangoloh a ponya momhangu moule womafiku 45.
Moshipofa shimwe vali osho ya Nangoloh a patululila ovanailonga vakulu voNamRights osha ponya konima eshi omutamaneki-ndjai a anya okuya komesho noihokolola.
Shaduva okwa ti oshipofa vali shimwe sha patululwa mOshakati nasho oshi na okuponya shaashi ya Nangoloh okwa anya okuwanifa po oipumbiwa yonhumba.
"Oipofa oyo ya Nangoloh te tu ningile otai holola nokutya ye omunhu ehe na oshinakuwanifwa. Okwa ekelashi omayele a pewa komahewa aye nokutya ku kendabalwe ediminafanepo. Otwa hala okumu kumaida nokutya ngeenge ota twikile, ohatu ka holola omauyelele oo twa yandja kokangudu kokukondjifa oilonga youlingilingi (ACC)," osho Shaduva a ti.
Eshi a pulwa a tye ko sha, ya Nangoloh okwa nyamukula ta ti "paudeko" laye, oshipofa eshi sha tendwa mo osha pamba ashike Tangeni Nuukuawo ndele inashi kwatela mo Shaduva na vakwao.
Okwa ti oshipofa osha tendwa mo she likolelela koutekinika wokutya, omunhu ou a shiivifila Nuukuawo nokutya okwa patululilwa oshipofa haye a li e na okushi ninga. Onghee oshipofa osha tendwamo manga opo Nuukuawo a shiivifilwe pamulandu wa ufwa.
Okwa ti oshipofa osho a patululila Shaduva na vakwao otashi twikile, okuninga shapo tava yandje ombili vo tava hauluka ombelewa yoNamRights mOshakati oyo va kwata po ombabjona.
Vahetatu ovo va patululilwa oshipofa ku ya Nangoloh shaashi vati va kakeka edina laye ovo: Festus Shaduva, David Shayelamo, Johanna Elago, Denys Nandjigwa, Festus Nuunyango, Tangeni Nuukuawo, Namibian Sun na Toivo Ndjebela.