Shoka tashi tilitha oshoo omusita gwongeleka ndjoka Ferdinand Nashidengo a ti kutya sho a thiki pongeleka ongula yOsoondaha okwa adha omiyelo adhihe dha pata nopongeleka inapu tewa ihe omaviinu ngoka ka ge mo.
Okwa lopotwa kutya aakwanegongalo yaali oyali ya pewa oshinakugwanitha opo ya ka lande omaviinu ngoka mEtitano lya piti naamboka oga gana nokugandja uumbangi wawo komeho yegongalo kutya oya landa omaviinu ngoka nokuga tula pehala lya gamenwa ihe shoo omusita pamwe naakuluntu yegongalo ya thiki pongeleka mOsoondaha moka kwali mu na okuninga oshililo omaviinu ka ge wetike.
Pethimbo lyoonkundathana aakwanegongalo yamwe po oya holola omaiyuvo gawo kutya otashi vulika iimaliwa yongeleka ya longithwa pambambo nomaviinu ngoka inaga landwa shili ihe mboka yali ya pewa oshinakugwanithwa shokukalanda omaviinu ngoka oya ulike uumbapila womafutilo.
Nashidengo pamwe nelelo lyongeleka oya hadha etungo alihe lyongeleka opo ya tale ngele ope na ngoka a teya ongeleka ihe inaya mona omandhidhiliko gasha.
Konima yoonkundathana okwa tokoliwa opo ka kuthanwe opolisi nenge aakwanegongalo yuulikathane ominwe.
Kakushiwike mpoka pwayi omakende gaali guudha omaviinu ihe ekende limwe li li oshitata ndyoka lyali lya hupu koshililo sha piti olya dhigwa mo nekende ndyoka olyo lya longithwa po.
OSHAKATI PLACIDO HILUKILWA